Cubela: "A xuventude de Cotobade, desencantada coa política, volverá votar en maio"

O candidato popular á alcaldía de Cotobade participou nos encontros dixitais que se están a desenvolver na convención do PP en Santiago

Cubela: “A xuventude de Cotobade, desencantada coa política, volverá votar en maio”

• A razón principal que o motiva a presentarse como candidato á alcaldía é a necesidade de cambio que se vive en Cotobade


Cotobade, 12 de febreiro de 2011.-

“A xuventude de Cotobade está desencantada coa política, pero volverá votar en maio, porque verá un proxecto que os motiva e que ten futuro”. Así asegurou hoxe o candidato popular á alcaldía de Cotobade, Jorge Cubela, en resposta ás preguntas dos internautas que contactaron con el nos encontros dixitais que se están desenvolvendo na convención que o PP de Galicia está celebrando en Santiago.

Na sala dos ciberpopulares, Cubela respondeu a todas as preguntas que lle formularon, e deu algunhas pinceladas do programa electoral que o PP de Cotobade ten pensado presentar no municipio pontevedrés.

Cubela asegurou que a dotación de servizos básicos como o abastecemento de augas, a creación de solo industrial, para evitar que os empresarios e autónomos do concello se asenten noutros muncipios como ata agora, ou a construción dun centro médico novo nas parroquias da zona alta do concello van ser actuacións prioritarias se o PP logra a alcaldía.

NECESIDADE DE CAMBIO

O mozo popular asegurou que a principal razón que o motiva para presentarse como candidato a lograr a alcaldía de Cotobade é a necesidade de cambio que vive o municipio, “o actual alcalde non só non cumpriu as expectativas que creou senón que non soubo manter o que estaba xa feito”.

Unha das cuestións que máis interese suscitou é como un mozo de 21 anos se decidiu a presentarse como candidato do Partido Popular. Cubela definiuse como centrista, galeguista e liberal, ideoloxía recollida nos estatutos do PP, partido co que se identifica.

Jorge Cubela sinalou que conta con todo o apoio da familia, especialmente co do pai, que estivo involucrado directamente na política municipal ao desempeñar durante 16 anos o posto de tenente de alcalde. Nesta liña, asegurou ademais que os seus amigos e veciños máis novos tamén “están contentos e volcados coa decisión tomada”.

Apuntou ademais que actualmente “a xuventude de Cotobade está desencantada coa política, pero a ilusión e o compromiso do PP co futuro do noso concello, farán que volvan votar en maio”.