A velas vir...

Houbo un poeta galego, Celso Emilio Ferreiro, que dicía que os galegos tiñan que mellorar a súa educación vial para que deixasen de pasar pola metade das estradas e camiños, os cales se multiplicaran co bo de Sancho Rof como ministro, para non estar sempre a velas vir e evitar desta maneira os accidentes e os atropelos.

Pois ben, da mesma maneira que Emilio Ferreiro dicía que os galegos estaban sempre a velas vir polos camiños e estradas, eu digo que en Pontevedra seguimos a velas vir con este desgoberno municipal. Todos sabemos cal foi o resultado das eleccións na nosa cidade e no que agora non vou a entrar xa que o fixen nun dos meus primeiros artigos, pero sí quero entrar nunha cuestión e é a seguinte. Lores, o gran derrotado das eleccións, ao que se lle poden recoñecer méritos e acertos durante os seus anteriores mandatos, non está actuando á altura das circunstancias, segue sen formar un goberno estable e traballador, tan só hai que recordar o número de concelleiros que houbo na anterior lexislatura e os que hai agora, a metade. ¿Que pasa, que agora non hai nada para facer?. O que ocorre é que se está a esperar a un pacto co Psoe que tardará semanas de moitas loitas se ao final se consuma, pero ¿mentres tanto que?. Dende a constitución da nova corporación seguimos igual que estabamos e o mellor de todo é que o noso alcalde non aparece xa nin polos periódicos, nin tan sequera o señor Mosquera. A pálisis que houbo en Pontevedra nos últimos catro anos foi denunciada por numerosos colectivos vecinais, asociacións empresariais, profesionais liberais e mesmo xente do propio goberno que responsabilizaba á Xunta da pouca importancia que se lle estaba dando á capital, Xunta que por certo leva as mesmas cores que o concello pontevedrés ou que o goberno central. E a día de hoxe esa pálisis segue igual, o primeiro evento de relevancia que houbo tras as eleccións foi o campeonato europeo de piragüismo e pasou como o vento, sen notarse e facendo pouco ruido, desperdiciando a promoción turística que brindaba; O Pxom segue sen aprobarse; Seguirase menospreciando as festas da Peregrina; e sen presentar solucións ao tráfico... ou o apoio ao deporte base. Os actuais políticos pensan que os proxectos para Pontevedra van entrar pola porta do concello ou que van a estar esperando por Lores ou Casal para facerse, e quen pense así nin entende de xestión nin entende de política, como é o que ocorre en Pontevedra.

Dn. Miguel Anxo: se aínda non é capaz de asumir o resultado electoral que os pontevedreses lle brindaron para ir á oposición e non quere recuperar o tempo perdido, deixe gobernar ós que sí gañaron nas urnas por unha grandiosa diferenza sobre vostedes, e así permitir que Pontevedra non se esté a converter nunha cidade dormitorio de Vigo.